بكره أجمل م النهارده دا من كلام جدو سيد حجاب

من ورا ستارة الليالي

شمس بكرة جايّة تاني

إحنا شايفينِك تعالي

يا ام ضحكة برتقاني

العروسة الدهبية

جايّة و ف شفايفها وردة

شمس بكرة جايّة جايّة

بكرة أجمل م النهارده

شُفت يوم عصفورة نونو

لسه طالعة من أودتها

ريشها كان مبلول و لونه

لون غناها و صوصوتها

قمت قُلت ف عقل بالي

بقى دي جناحها يشيلها؟

سِبتها و مشيت في حالي

بعد مدة قلت آجي لها

قال لي واحد من جيرانها

ياه دي طارت ليها مدة

قلت معنى طيرانها

بكرة أجمل م النهارده

شُفت مرة مهرة سمرانونو

ماسكة ف ديل مامتها

قُلت بكرة حتبقى حرة

تجري وحديها براحتها

عدى شهر و شهر تاني

شُفتها فرسة جميلة

تنطلق تجري ف ثواني

تقطع الرحلة الطويلة

قمت قلت لها قولي لي

ليه بتجري يا مهرة شاردة

قالت الريح بتنادي لي

بكرة أجمل م النهارده

من ورا ستارة الليالي

شمس بكرة جايّة تاني

إحنا شايفينِك تعالي

يا ام ضحكة برتقاني

العروسة الدهبيةجايّة

و ف شفايفها وردة

شمس بكرة جايّة جايّة

بكرة أجمل م النهارده

كلام جدو سيد حجاب كان بيقوله لجدو ابراهيم فى البيت

نفسي أنا
أصرخ بحس عالي
على شمسنا
و أقول لها تعالي
خدي همّنا
و خدي يأسنا
و دوّبي الليالي
و هاتي لنا بكرة أحنّ من أمسنا

يا رب ليه الحقيقة
في الدنيا تايهة و غريقة؟
الكدب ليه توبه زاهي؟
و الدنيا مش زي ما هي؟
دي دنيا دي .. ولا غابة؟
ولا مدينة ملاهي؟
أنا تهت ليه؟ بس مالي؟

دنيا اللي فيها كافيها
طفولتنا ليه ضايعة فيها؟
و شبابنا جوّاه دموعه
لكن بيحلم ببكرة
حابس ضناه بين ضلوعه
و بكرة في القلب فكرة
قرّب يا بكرة و لالي