على فكرة

على فكرة
أهلا بيكم أولا

تانى حاجة أنا كنت وعدتكم أحكيلكم حكاية جديدة
لكن للأسف الجهاز بتاعنا زى ما إنتوا شايفين


السيد بابا شغل نفسه بيه وما خلصوش تصليح
أنا قلت يابت يامرام مابقى وقت للانتظار

اتصلت بالواد ده
إبن عمو أحمد ألماظ
وقلت ياللا يا ابنى نشوف حل فى حكاية الكمبيوتر ده
وانتوا شايفينه معايا أهه

وعلى الله تفلح محاولاتنا ونصلح الرامات أو البروسور

ولواحتاج ويندوز هننزل ويندوز جديد
يعنى مرة تانية أصبروا عليا شوية

وسلامات سلامات سلامات

هارجع على طول

بس انتظروا شوية وهاحكيلكوا حكاية جديدة

إوعوا تقلقوا

ماشى؟

مشاوير مشاوير دنيا مشاوير

شوفوا بقى


من الأول كده


أنا فرحانة أوى بحكاية مشوار كل يوم ده


قبل الضهر خالتو ميادة تكون عندنا ، وتكون الست ماما لبستنى فستان وجهزت كل اللى هاحتاجه طول النهار


وبسرعة ننزل جرى


ونبدأ مشوار الصبح على جدو ابراهيم


يكون واقف بينتظرنا على راس السلم فى البيت


وهيصة وهلليلة من كل اللى يكون موجود ساعتها


هيييييييييييييييييه الست مرام وصلت ياولاد


وخاصة خالتو يمنى ، وانا بخاف منها عشان هيا اللى بتعضنى فى دراعى


وباسمع جدوا دايما يزعق فيها عشان متزعلنيش


وكمان الواد ماجد إبن تيتة بشرى


شكله ملخبط وعفريت بس أنا باحبه أوى


وموش عارفة ليه جدو على طول ياخدنى ويدخل معايا الحمام عشان يحممنى


وموش عارفة ليه لما يشيلنى أروح نايمة على طول على دراعه؟


المهم أصحى وآكل فوق عند تيتة منى


وألعب لحد المغرب


ونبدأ مشوار تانى هوا مشوار الرجوع لماما


بتكون مستنيانى على باب البيت لما نضرب الجرس تفتح بسرعة


بس أنا بصراحة بابقى زعلانة على حاجتين


أول حاجة إنى باسيب جدو ابراهيم وارجع لماما مى


تانى حاجة بتصعب عليا خالتو ميادة بتاعة المشاوير الضهر وآخر النهار


لكن بقى هنعمل إيه؟


دنيا مشاوير


موش كده واللا إييييييييييه؟