ياللا ياماما نروح لعمتوا أسماء

النهاردة معايا ليكم خبر خلو خالص

بس على الله ماما تشهل شوية وتلبسنى فستانى عشان نروح نشوف عمتو أسماء

عمتو أسماء راجعة من قطر عشان تشوفنى

وانا موش عارفة لسه قطر يعنى إيه

ياللا ياماما

أنا هاقول لعمتو غنوتى الجديدة إللى ماما بتحفضهالى من كتاب تانت صفاء عبد المنعم

***

تلات معالق ع السفرة

واحدة تزن وواحدة ترن

وواحدة تقول يامحلا الدم

***

تلات معالق ع السفرة

واحدة تزن وواحدة ترن

وواحدة تقول ياماما

عايزه آكل مكرونة

والمكرونة فى الكسرونة

والكسرونة فى النملية

والنملية فى العملية

والعملية فى المستشفى

والمستشفى بعيدة عليا

إخص عليكى يارجليا

***

والعملية فى المستشفى

والمستشفى عايزة فلوس

والفلوس فى الخزنة

والخزنة عايزة مفتاح

والمفتاح عند الفلاح

والفلاح عايز تفاح

والتفاح فوق الشجرة

والشجرة عايزة مايه

والمايه من عند الله

***

إيه رأيكم

لو أنا عرفت أغنيها لعمتو أسماء

زى ما حضرتها ماما

إللى لسه ما لبستنيش الفستان

حفضتهالى؟

أدام التليفزيون وماما بتغنيلى

ماما أعدتنى أدام التليفزيون

وراحت تغنيلى أغنية

من كتاب تانت صفاء عبد المنعم صاحبة جدو ابراهيم

واسمها ( بنت السلطان )

بنت السلطان

لبسه القفطان

بتلاته ريال

شعرها ضانى ضانى

لفيته على حصانى

وحصانى طلع الملعب

والملعب عايز سلم

والسلم فى الخزانة

والخزانة عايزة مفتاح

والمفتاح عند الفلاح

والفلاح عايز مسمار

والمسمار عند الحداد

والحداد عايز بيضة

والبيضة عند الفرخة

والفرخة عايزة قمحة

والقمحة عند التاجر

والتاجر عايز فلوس

والفلوس عند الصريف

والصريف عايز لبن

واللبن عند البقرة

والبقرة عايزة حشيشة

والحشيشة فى الجنينة

والجنينة فيها عصافير

والعصافير تزقزق وتطير

طيرى طيرى ياعصافير

هااااااااااى .. صباح الخير جدو

هاااااااااااااى


صباح الخير جدو


تعرف؟


ساعات باحس إنى غلطت فى حقك


وساعات أرجع وأول :
لأ يامرام . إللى عملتيه صح

لأنى أول لسانى ما اتحرك جوا بؤى ، قلت : با.. با.. ه

وقالوالى إن تيتة منى زعلت هيا كمان عشان أنا أول ما نطأت كان لازم أأول / جد ..جد . ووو


تعرف ياجدو؟


هيا تيتة موش زعلانة عشان أنا ما ؤلتش جدو


لااااااااااااا


دى زعلانة عشان ما ؤلتش ما..ما..اااه


لأنها بحسها عارفة إنى بعدها كنت هاؤوول : تى. تى..تة


عشان كده خايفة إنى بعد بابا


هاؤؤول جدو


وصدقونى


لو كنت أأدر أحطكم كلكم على لسانى الزغيوووووووووور كنت حطيتكم ودوءت طعم حلاوتكم كلكم


وحظه بأى سى محمد عبد البديع إللى هوا بابا إنى نطأته الأول


متزعلش بأى وتعالى ياجدو ياشاطر ياشطارة


تعالى نطير طيارة


إنت تمسكها بإيدك


وآنا ألف الدوبارة


هيييييييييييييييييه